Ongi etorri Zugarramurdira; Nafarroako Mendialdearen eta Kantauri itsasoaren artean, Xareta mugaz gaindiko eskualdearen bihotzean kokatuta dagoen 250 biztanleko herri txikia.

Lehenengoz entzuten dutenek aho-korapilo itxura hartzen dioten izen bihurri horrek, bertakoek erraten dutenez, "zumarrak, hurritzak eta ereinotz edo erramuak" ditu hizpide, bertan ohikoa den landaretza. Horiez gain, pagadi hostotsuek, elezaharrez solasten diren mendiek (Larrun eta Atxuri, errate baterako), baserri bakanduek, belai berdeek, ardi latxen artaldeek eta pottokek betetzen dute herri honetako paisaia.

Herrigunera helduta, bisitaria baserri zaharrez ohartuko da lehenik, Jasokundearen eliza eta Dutaria jauregia gailen dituztela. Lau auzo sakabanatu; Azkar, Madaria, Etxartea eta Olasur. Denen artean sei kilometro koadro eskas osatzen dute.

1610ean, Logroñoko inkisizio-auzitegiak 31 herritar epaitu zituen sorginkeriarekin lotura zutelakoan. Gertakari lazgarri hark betirako aldatu zuen herriaren bizitza, eta mundu osora zabaldu zuen herriaren izena. Milaka lagun hurbiltzen da urtero "sorginen herria" ezagutzera, gertakari historiko hark eta horren inguruan sortu diren elezaharrek erakarrita.

Xarmaz beteriko ukitu magikoak, iragan lazgarriak eta natura bete-beteak bat egiten dute Zugarramurdin, ttipia bezain dinamikoa den herri honen garapen soziokulturalera bideratutako turismo-eskaintza erakargarria eskaintzeko.

Leizea, elezaharretako akelarreen lekuko isila, eta Sorginen Museoa, memoria historikoa jasotzen duen txokoa, estereotipoak alde batera utzita, garai anker bateko triskantzak pairatu zutenei ahotsa ematen dien txokoa; biak bisitatu beharrekoak. I baliabide horiek Zugarramurdiko Garapena SLk kudeatzen ditu.