Sorginen museoa sortuta, Zugarramurdiko Udalak udalerriko turismo-baliabideak modurik egokienean kudeatzeko ereduari buruzko hausnarketa egin zuen. Zugarramurdiren errealitate zehatzari buruzko azterlanak agerian utzi zuen halako ezaugarriak izanen zituen museo-ekimena bultzatzeko, ezinbestekoa izanen zela udalaren funtsezko eginkizuna; izan ere, bera baita herritarrengandik hurbilen dagoen administrazioa, eta berak baitu kultur ekintza garatzeko borondatea, eta proiektuaren titularitatea.

Hainbat instituzioren elkargunea eta lankidetza indarrean paratzea ahalbidetuko zuen kudeaketa-eredu berria definitzea pentsatu zen. Afera zen funtsezko hiru erronka hauei erantzutea:

• Giza baliabideak, baliabide materialak eta finantzarioak kudeatzeko tresna arin eta moderno baten premia.
• Proiektuaren kudeaketan hainbat instituzio eta eragile inplikatzea.
• Kultur, hezkuntza eta turismo-zerbitzuen ustiapen ekonomikoa bultzatzeko aukera.

Zugarramurdin kultura eta turismoa kudeatzeko aukerarik onuragarriena kapital publikoko merkataritza-sozietate bat sortzea izanen zela ikusi zen, baina, betiere, sektore pribatua inplikatzeko aukerari ateak zabalik utzita. Aipatu sozietatearen izena Zugarramurdiko Garapena da, eta bere eginkizun nagusia ondare-baliabideak kudeatzea da. Helburuak lortze aldera, Zugarramurdiko Garapena SLk honako hauek egin ditzake:

• Zugarramurdin beharrezkoak ikusten diren lanak eta zerbitzuak, ondare-baliabideak eta azpiegiturak kudeatu eta gauzatu: leizea, Sorginen Museoa eta Errotaberri errota, besteak beste.
  
  
• Bisitariek udalerriko ondare-elementuen berri izateko bisita gidatuak eta gidatu gabeak prestatu.
  
  
• Zugarramurdin kultura, artea eta turismoa sustatzeko ekintzak antolatu.  

• Errotaberri landetxea kudeatu.
  
  
• Udalerria eta bere ondare, natur, kultur, historia eta turismo-baliabideak sustatzeko ekintzak gauzatu.
  
  
• Bere jarduerak garatzeko beharrezkoak diren langile adituak eta kanpoko zerbitzu espezializatuak kontratatu.